Interpreter of Maladies
Wednesday, April 27, 2005
nayi kavitakahin door mann bhatak raha hai
kehne ko to des naya hai
fir kyun tumko dhoondh raha hai
birhi mann fir bhatak raha hai
bandhan, rishte, naate chode
tumko choda tha jab maine
haath chuda kar bhaagi thi main
ban vihaag us door gagan mein
ahankaar yun chalak raha tha
meri vaani, mere mann mein
par ab kyun, sab lage adhoora
do nainon ke pinjare mein hi
acchi lagti hai ye maina
ye jeevan ab nahi mera hai
birhi mann fir bhatak raha hai
yahan nahi hai apna koi
bunein na aankhein sapna koi
chitthi mein main kya likh doon ki
kam ho jaaye apni doori
shaam ghaneri, baahein khole
mere aise asmanjas pe
dheere dheere kilak rahee hai
ye aankhein fir bilakh rahi hain
kehne ko to main swatantra hoon
par mann bandhan maang raha hai
kahin door mann bhatak raha hai
