Interpreter of Maladies
Friday, August 19, 2005
unrequited loveab der hoti jaa rahi hai, shaam dhalne lag gayi
fir kyun nahi bajti swapn mein bhi tumhari bansuri
kumhla gaye hain pushp, pallav, ashakt hai vasundhara
aur mere haathon mein nahi kuch, sirf smritiyon ke siva
main baat johti radha
ashakt, akeli radha
vishwas hai ki tum abhi jhurmut ke peeche
hanske mujhpe, fir jhalak dikhlaoge
aur fir unhi athkheliyon se tum mujhe bahlaoge
par main kab tak yun akele, bas swapan mein hi jiyoon
prem hai par prarthana se yun vivash kab tak rahoon
main baat johti radha
ashakt, akeli radha
kya itna ashakt aur vivash mera prem hai
ki tum nahi aate, na aati koi kushal kshem hai
ye satya hai radha ka janm, sirf tumse hai juda
par mera kya koi bhi swantatra astitva hai yahan
main baat johti radha
ashakt, akeli radha
in rookhi alkon, bheegi palkon, sookhe hothon se kaho
prastar hui in vednayon, bhavnaoon se kaho
ki ab nahi aaoge tum, aur vyarth hai inka ye tyaag
tum, tumhari bansuri, ho gayi vyom mein vyapt
main baat johti radha
ashakt, akeli radha
radha ki ab kaun sunega, bina krishna ke kaisi radha
jeevan to hai chapal sada hi, wo kab kiske liye rukega
tum apne mahatm aur tyaag mein yun lupt the
ki krishna tumne aap hi radha ko nikrishna kar diya
main baat johti radha
ashakt, akeli radha
main mandiroon mein rakh kar pooji jaoongi sadiyon sada
par jis pal tum mere parshva mein nahi hoge
meri moorat ko kaun poochega
shayad mera swarth hai jo maangati hoon swadhikar
par kya karoon main ishwar nahi tumhari tarah
main baat johti radha
ashakt, akeli radha
